Më bëjnë me dije se nëse viziton faqen e Guardian duke përdor AdBlock, të shfaqet mesazhi i fotos këtu sipër. Me siguri një mënyrë e sjellshme për t’i kujtuar një vizitori jo korrekt se përmbajtja që po konsumon *falas* ka një kosto, dikush e ka prodhuar dhe meriton të marrë në këmbim atë që i takon për mundin. Qoftë një cent, qofshin miliona.
Kjo më bëri të pyes veten: sa do të ishin të gatshëm ata që përdorin AdBlock (dhe e di që janë të shumtë) të paguajnë një abonim për çfarë konsumojnë? Kam përshtypjen, pak. Por meqë nuk duan të bezdisen nga publiciteti dhe as të nxjerrin lekë nga xhepi, sa janë të gatshëm këta të punojnë falas në profesionin e tyre?
Interneti nuk është më në ditët e para për të vazhduar të bëjmë sikur nuk e kuptojmë që *falas* nuk ekziston. Online punojnë njerëz që mbajnë veten dhe familjen, ndaj meritojnë të paguhen për punën e tyre. Këto para nëse nuk i nxjerrim ti dhe unë nga xhepi, do të vijnë nga reklamat. T’i bllokosh ato, nuk është e ndershme, nëse nuk je i gatshëm të vësh dorën në portofol.
Everything you need to know about the future of print is in this chart: http://t.co/THpygFpYth pic.twitter.com/eUCi6cWFVW
— Mathew Ingram (@mathewi) May 27, 2015
Askush nuk mendon të bllokojë reklamat në print, radio apo televizion. Grafiku këtu sipër tregon një disbalancë të qartë mes printit dhe Internetit në raport me reklamat. Për më tepër, për një gazetë print shpesh paguan. Paguan për të lexuar artikujt dhe për të parë reklamat. Pse kjo pranohet dhe reklamat online jo?
Për kë është i/e interesuar, artikulli këtu hedh më shumë dritë mbi fenomenin e bllokimit të reklamave, shpjegon përse kompanitë heshtin dhe cilat janë vendet më të prekura.